ముంబయి ఈడీ కార్యాలయంలో అగ్నిప్రమాదం.. నీరవ్, చోక్సీ కేసుల దర్యాప్తుపై ఈడీ కీలక ప్రకటన

దక్షిణ ముంబయిలోని ఎన్‌ఫోర్స్‌మెంట్ డైరెక్టరేట్ (ఈడీ) కార్యాలయంలో భారీ అగ్నిప్రమాదం సంభవించింది. ఈ ఘటనలో పరారీలో ఉన్న వజ్రాల వ్యాపారులు నీరవ్ మోదీ, మేహుల్ చోక్సీలకు సంబంధించిన కీలక దర్యాప్తు పత్రాలు కొన్ని దెబ్బతిని ఉండవచ్చని వార్తలు వెలువడ్డాయి. అయితే, దర్యాప్తునకు ఎలాంటి ఆటంకం ఉండదని, అన్ని రికార్డులు డిజిటల్ రూపంలో భద్రంగా ఉన్నాయని ఈడీ సోమవారం స్పష్టం చేసింది.

బల్లార్డ్ ఎస్టేట్‌లోని కైసర్-ఐ-హింద్ భవనంలోని నాలుగో అంతస్తులో ఉన్న ఈడీ ముంయి జోనల్ ఆఫీస్-1లో ఆదివారం తెల్లవారుజామున 2:25 గంటల ప్రాంతంలో మంటలు చెలరేగాయి. భద్రతా సిబ్బంది గమనించి వెంటనే పోలీసులకు, అగ్నిమాపక విభాగానికి సమాచారం అందించారు. సుమారు 10 గంటల పాటు శ్రమించి అగ్నిమాపక సిబ్బంది మంటలను అదుపులోకి తెచ్చారు.

పత్రాలు కాలిపోవడం వల్ల దర్యాప్తుపై ప్రభావం పడుతుందన్న ఊహాగానాలను ఈడీ అధికారి ఒకరు తోసిపుచ్చారు. "దర్యాప్తునకు సంబంధించిన కీలకమైన ఆధారాలు, పత్రాలు అన్నీ డిజిటల్ రూపంలో, అలాగే అంతర్గత కేంద్రీకృత రికార్డు కీపింగ్ వ్యవస్థలో భద్రంగా ఉన్నాయి. ప్రాసిక్యూషన్ ఫిర్యాదులు దాఖలు చేసిన కేసులకు సంబంధించిన అసలు పత్రాలు సంబంధిత కోర్టుల్లో అందుబాటులో ఉన్నాయి. కాబట్టి, దర్యాప్తు లేదా విచారణకు ఎలాంటి ఆటంకం ఉండదు" అని ఓ ప్రకటనలో తెలిపారు.

నాలుగో అంతస్తులోని పవర్ బాక్సుల్లో ఏర్పడిన విద్యుత్ షార్ట్ సర్క్యూట్ కారణంగానే ఈ ప్రమాదం జరిగి ఉండవచ్చని ప్రాథమికంగా అంచనా వేస్తున్నట్లు అధికారి తెలిపారు. గ్రౌండ్, మొదటి అంతస్తుల్లో కార్యాలయాలు యథావిధిగా పనిచేస్తున్నాయని, అగ్నిప్రమాదం జరిగిన నాలుగో అంతస్తులోని కార్యాలయ విభాగాన్ని వెంటనే జన్మ్ భూమి ఛాంబర్స్‌లోని పాత ప్రాంతీయ కార్యాలయానికి మార్చి, కార్యకలాపాలు కొనసాగిస్తున్నట్లు వెల్లడించారు.